Aurland kommune 
Tekst og foto: Scandion

Opretta som eigen kommune i 1837
Kommunenr: 1421 
Fylke: Sogn og Fjordane 
Administrasjonssenter: Aurlandvangen 
Flatevidde: 1488,7 km² 
Folketal: 1695 (2008) 
Målform: Nynorsk

Dramatisk naturlandskap og mange spennande aktivitetar gjer Aurland til eit populært reisemål. Med bil, buss, tog eller båt har du lett tilgjenge til naturen som Aurland, Flåm, Gudvangen og Undredal byr på. Turisme, service, transport og produksjon av elektrisk kraft er i dag dei viktigaste næringsvegane.

Om ein går tilbake til 1773 - så gjekk faktisk hovudvegen mellom Bergen og Oslo gjennom Aurland. Ruta var inn Nærøyfjorden og opp Nærøydalen.  Og i dag går stamvegen mellom landets to største byar også gjennom Aurland, ein veg med gul midtstripe og fleire lange tunnelar.
I 1940, etter 20 års arbeid, kom det første toget på Flåmsbana i drift. Den einaste jernbana i Sogn og Fjordane og ein av dei største turistattraksjonane i landet.

Vegsamband til resten av fylket kom då vegen over fjellet til Lærdal stod ferdig i 1967, ein veg som no er ein stor turistattraksjon der reisande har eit fantastisk utsyn over bygd og fjord. På vinterstid var Aurland framleis isolert, inntil vegen austover til Hol i Hallingdal kom i 1974, - eit resultat av ei omfattande kraftutbygging. Seinare kom ferjefritt samband mellom Bergen og Oslo ved Flenja- og Gudvangatunnelen i 1991- og opninga av Lærdalstunnelen i 2000.