1930-åra er ikkje berre kjend for si arbeidsløyse og for sin kapitalmangel. Naud har alltid lært naken kjerring å spinne, og i desse åra voks det fram innkjøpslag både på Takle og i Brekkebygda. 

Her vart nok ein del arbeid gjort på dugnad, men denne måten å handle på, gjorde det mogeleg å spare pengar på det som trongst på gardane. 

I 1947 fekk laget tilbod om å kjøpe ei barakke i Rutledalen for 650 kr. og laget fekk løyve til å setje ho opp på kommunen sin eigedom, "Trekanten", nedanfor kyrkja i Brekke. 

På denne tomta hadde floren og løa på eitt av dei eldste bruka i Brekke stått, og staden var sentral i høve til vegar og tilkomst den gongen. 

29. april 1948 vart butikken opna med Normann Gausemel som styrar. Sidan har laget hatt 7 styrarar, der dei to siste bør nemnast særskilt. Ingunn Ynnesdal og Aud Berit Raae. Dei delte styrearbeidet i mange år etter at laget hadde økonomiske vanskar i 1982. Dei samarbeidde på ein flott måte og med oppslutnad av medlemene berga dei drifta. I dei siste 6 åra har Aud Berit vore styrar åleine, og attåt tenesta som butikkhjelp er ho den som har arbeidd lengst i Brekke Samyrkelag. 

Eit samyrkelag har både årsmøte og styre, og Brekke Samyrkelag har hatt stor samanheng i styringa. På dei snart seksti åra har det berre vore 6 formenn eller leiarar som det heiter no. 

På 40- og 50-talet var det stor tilslutnad til årsmøta som gjerne vart markerte med store festar. Men i seinare år reknar nok mange med at livet og butikkverksemda går sin gang om ein ikkje tek del i styringa. Oppslutnaden om butikken har no likevel vore aukande, kanskje mest fordi mange ser verdien av å ha 2 butikkar i bygda. 

I mange år var laget på leit etter høveleg tomt til ny butikk. Men vegplanane bar tidleg bod om endring, og kommunikasjonane skifte fort på 60- og 70-talet, slik at noverande plassering vart rimeleg sentral, endå nærleiken til kyrkja hindra utbyggingsplanane noko. 

Den nye butikken vart opna 27. november 1979. Og i 2001 vart namnet endra, nærmast etter diktat, til COOP Brekke BA, og vart frå 1. jan. 2003 med i Marked-kjeda.